"أكرمتني ودللتني وحبيتني وحبيتك أكتر كل يوم" .. رسالة مُؤثرة من زوجة غزيّة إلى زوجها الشهيد

• نور أبو ندى تكتب لزوجها الشهيد بلال أبو سمعان
• "أكرمتني ودللتني وحبيتني وحبيتك أكتر كل يوم" .. رسالة مُؤثرة من زوجة غزيّة إلى زوجها الشهيد

كتبت الغزيّة نور أبو ندى كلماتٍ مُؤثرة تعتصر لها الأفئدة، واصفةً حُبها الصادق المُفعم بروح الصّمود والصّبر لزوجها الشّهيد بلال أبو سمعان.

ونشرت نور: "زي اليوم من ٩ سنين كان كتب كتابي، كان يوم خميس ..

رحنا عالمحكمة طلعت مسكرة مأجزين .. وحكولنا بتفتح يوم الأحد فقلنا خلص للأحد

بلال ما رضي وقف مع راجل وسألو وين بيت القاضي ! وبطريقته وسحره عرف المكان

واجا يحكيلنا يلا ع دار القاضي أهلي وأهلو قالو لشو الاستعجال خلص للأحد

قلهم توكلو ع الله .. يلا ع دار القاضي والكل صار يضحك

فعلا رحنا ع بيت القاضي وكتبنا كتابنا هناك

يوم الخميس ٣١/١٢/٢٠١٤ اخر يوم بالسنة ولما سأله القاضي هل توافق ان تكون نور زوجة لك رفع ايديه وقلو اكيييد موافق

الكل ضحك وانا قلبي كان بدو يوقف من الفرح ومن الخجل ومن كل المشاعر الحلوة

كان ولا زال هاليوم أحلى يوم بعمري كله

بحبه كتير لأنه جمعني بأحلى وأغلى شريك بالدنيا

وما بنسى ولا تفصيله صغيرة بهاليوم الحلو وبباقي الأيام والاوقات ..

أكرمتني ودللتني وحبيتني وحبيتك أكتر كل يوم

وأكبر شاهد على قصة حبنا الحلوة أولادنا التلاتة حسام ويوسف وعلوش

ذكرياتي الحلوة معك من أول الطريق حتكفيني أكمل حياتي كلها مغمورة بحُبك وحنانك وغلاوتك حتكفيني بإذن الله
وربنا رحيم حيحفنا برعياته ولطفه ويصبر قلبي عالبعاد المؤقت قبل ما ألحقك
الملتقى الجنة يا قلبي 🤍

بتلبقلك الشهادة يا نور العين